Lukas 23

Hyang Yesus ring Arepan Gubernur Pilatus

Raris makasami parumane sane wenten irika pada ngadeg, tur ipun sami makta Hyang Yesus ring arepan gubernur Pilatus. 2 Irika ipun sami nuduh Hyang Yesus saha mabaos sapuniki, “Titiang makasami manggihin Anake puniki ngajahin bangsan titiange nungkasin pemrentahan Romawine, inggih punika nombang titiang sami naur pajeg ring pemrentah. Samaliha Ipun ngorahang deweknyane , inggih punika Raja.”

3 Raris gubernur Pilatus mataken ring Hyang Yesus sapuniki, “Apake Ragane Rajan anak ?”

Hyang Yesus nyaurin sapuniki, “Inggih patut sekadi baos jerone.”

4 Gubernur Pilatus mabaos ring para lan anake akeh sapuniki, “Tiang nenten ja manggihin kaiwangan Anake puniki.”

5 Nanging ipun sami malih nesek gubernure saha mabaos sapuniki, “Anake puniki manes-manesin bangsan titiange nganggen pengajahan Ipune ring saluirin Yudea. Ipun ngajahin ngawit saking Galilea tur mangkin sampun rauh iriki.”

6 Mirengin paindikane punika, gubernur Pilatus raris mataken sapuniki, “Napike Anake puniki anak Galilea?”

7 Raris gubernur Pilatus mireng yening Hyang Yesus anak saking Galilea, inggih punika wawidangan raja . Irika raris gubernur Pilatus mrentahang mangda Hyang Yesus kabakta ring raja Herodes, sane kabenengan wenten ring Yerusalem.

Hyang Yesus ring Arepan Raja Herodes

8 Raja Herodes kalintang seneng nyingakin Hyang Yesus krana sampun sue mireng indik Hyang Yesus tur meled nyingakin Ida. Samaliha sang raja meled pada nyaksiang Hyang Yesus ngaryanin paindikan sane ngangobin. 9 Punika mawinan raja Herodes sedsed mataken ring Hyang Yesus, nanging Hyang Yesus nenten ja masaur. 10 Irika raris para pemimpin lan sane wenten irika ngancan keras nuduh Hyang Yesus. 11 Turmaning raja Herodes sareng para tentarane nganistayang lan ngendahang Hyang Yesus tur nyalukin Ida pengangge agung. Raris raja Herodes mrentahang mangda Ida kabakta mawali ring gubernur Pilatus.

12 Sadereng paindikane puniki, raja Herodes lan gubernur Pilatus mamusuh, nanging duk punika ipun sareng kalih dados pasawitran.

Hyang Yesus Katibakang Ukuman Padem

13 Gubernur Pilatus munduhang para pemimpin rsine lan pemimpin-pemimpin bangsa Yahudine tur rakyate makasami. 14 Raris gubernur Pilatus mabaos ring ipun sami sapuniki, “Ragane sami mriki makta Anake puniki ring arepan tiange, saha nuduh Ipun ngajahin rakyate paindikan sane nungkasin pemrentah. Nanging ragane nyaksiang padidi, tiang sampun mreksa Ipun lan nenten wenten kaiwangan sane panggihin tiang sekadi baos ragane. 15 Kenten pada raja Herodes nenten ja manggihin kaiwangan Ipune. Punika mawinan Anake puniki kabakta malih mriki. Sujatine Anake puniki nenten ja wenten kaiwangannyane sane patut keni danda ukuman padem. 16 Tiang jagi mecutin laut mebasang Ipun.” 17 [Gubernur Pilatus ngamaosang sekadi punika krana sebilang rarainan Paskah, ipun musti mebasang anake sane keni ukuman.]

18 Nanging ipun sami sane wenten irika pada masuryak sapuniki, “Matiang ja Yesus, lan bebasang ja Barabas.” 19 Duk punika I Barabas sedek kakrangkeng ring bui krana ipun taen ngranayang biyut ring kota turmaning ngamademang anak.

20 Gubernur Pilatus meled mebasang Hyang Yesus. Punika mawinan gubernur Pilatus malih pisan mabaos ring anake akeh punika. 21 Nanging ipun sami masuryak sapuniki, “Salibang ja Yesus! Salibang ja Yesus!”

22 Sane kaping tigane gubernur Pilatus mabaos malih ring ipun sami sapuniki, “Nanging napike kaiwangan Anake puniki? Abesik ja tiang nenten manggihin kaiwangan Anake puniki sane mawinan Ipun sida kaukum padem! Tiang jagi mecutin tur mebasang Ipun.”

23 Nanging anake akeh masuryak ngancan keras mangdane Hyang Yesus kasalibang. Tur malantaran suryakan anake akeh punika pinunasnyane kadagingin. 24 Irika raris gubernur Pilatus nibakang ukuman padem ring Hyang Yesus krana pikayunan anake akeh punika. 25 Turmaning manut pinunas anake akeh, gubernur Pilatus mebasang Barabas sane kakrangkeng ring bui krana ipun ngranayang kotane biyut lan ngamademang anak lianan. Nanging Hyang Yesus kaserahang ring tentara Romane mangda kasalibang manut pikayunan anake akeh punika.

Hyang Yesus Kabakta Medal saking Kota Yerusalem

26 Ritatkala Hyang Yesus kabakta ka genah ukuman padem, irika para tentarane matemu sareng anak asli Kota Kirene sane liwat irika nuju Kota Yerusalem. Anake punika mapesengan I Simon. Irika I Simon kaejuk tur kapaksa mamargi negen kayu ring ungkur Hyang Yesuse. 27 Kenten pada, akeh anake sane nututin Hyang Yesus; irika taler wenten anak istri-istri sane nangisin Hyang Yesus antuk manah sane sebet. 28 Nanging Hyang Yesus nyingakin kuri saha ngandika, “Wih, luh-luh Yerusaleme! Eda ja Tiang pangelingina, sakewala pangelingin ja dewek ragane padidi muah pianak-pianak ragane. 29 Krana bakal teka dinane anake ngraos, ‘Amat liangne luh-luhe ane bekung, tur ane tusing taen nglekadang pianak saha tusing taen manyonyoin.’ 30 Di dinane ento anake bakal ngraos kene, ‘Wih gunung-gununge! Tepen ja tiang sami! Wih bukit-bukite! Urug ja tiang sami!’ 31 Sawireh yening anake malaksana buka kene tekening Tiang, apa buin tekening anake ane jaat ene! Tiang buka saang ane nu matah, nanging anake ane jaat ene buka saang ane suba tuh.”

Hyang Yesus Kasalibang

32 Duk punika wenten kalih anak jaat sane kaukum padem sareng-sareng Hyang Yesus. 33 Ritatkala rauh ring genahe sane kasambat “Tengkorak,” irika Hyang Yesus kasalibang sinarengan sareng makakalih anak jaate punika. Sane siki ring tengawan Idane lan malih siki ring kebot.

Gambar: Hyang Yesus kasalibang (23:33)

34 Raris Hyang Yesus ngandika sekadi puniki, “Inggih ! ja ipun sami! Duaning ipun nenten uning napi sane kalaksanayang kapining Tiang.” Irika tentarane matoh-tohan ngocok undi jagi mastiang sira sane dados ngambil penganggen Hyang Yesuse.

35 Anake akeh sane wenten irika ngadeg nonton paindikane punika. Tur ritatkala punika, para pemimpin-pemimpin Yahudine nganistayang Hyang Yesus saha mabaos sapuniki, “Ia suba anak len. Ane jani, yen saja Ia sane Kajanjiang tur sane kapilih olih Sang Hyang Pengardi, depang ja Ia nylametang dewekne padidi.” 36 Kenten pada para tentarane ngewerin Ida, tur ipun ngicen anggur sane masem kapining Ida 37 saha mabaos sapuniki, “Yening Ragane Rajan anak Yahudi, slametang ja dewek Ragane!” 38 Kenten pada ring duur kayu salib Hyang Yesuse katulis lengkara sapuniki, “Niki Rajan anak Yahudi.”

39 Asiki saking anak jaate sane kasalibang irika nganistayang Hyang Yesus saha ngamaosang sapuniki, “Boyake Ragane Sang Prabu ane kajanjiang? Nah, slametang ja dewek Ragane padidi lan icang ajak dua!”

40 Nanging anak jaate sane malih siki nguelin ipun sapuniki, “Adi cai tusing nyeh kapining ? Krana cai nerima ukuman ane patuh kadi Ida. 41 Iraga ajak dua pantes nerima ukumane ene ulian parilaksanan iraga ane jaat. Nanging Ida nenten ja malaksana jaat neng abesik!” 42 Raris anake punika matur sapuniki, “Duh Hyang Yesus, elingin ja titiang ritatkala Iratu ngawitin mamrentah dados !”

43 Hyang Yesus nyaurin sapuniki, “Pracaya ja! Dinane jani ragane lakar bareng-bareng ngajak Tiang di genah sane luih.”

Hyang Yesus Seda

44 Sawetara jam roras tengaine, suryane nenten masinar, lan negerine irika dados peteng dedet kantos jam tiga sore. 45 Ring jeroan Genah Agung Mabakti kapining Sang Hyang Pengardi, langsene uek dados kalih. 46 Raris Hyang Yesus ngandika jangih sapuniki, “Duh Aji! Ring tangan Iratune Titiang nyerahang jiwatman Titiange.” Sasampune Ida matur sekadi punika, raris Ida seda.

47 Ritatkala pemimpin tentarane nyingakin paindikane punika, ipun ngagungang Sang Hyang Pengardi, saha mabaos sapuniki, “Sujatine, Anake punika anak dharma.” 48 Anake akeh sane nonton irika, nyaksiang paindikan sane mamargi punika. Raris ipun sami budal saha nigtig tangkah krana maselselan. 49 Lan makasami sawitran Hyang Yesuse taler anak istri-istrine sane nututin Ida saking Galilea ngadeg saking adoh nyaksiang saluirin paindikane punika.

Hyang Yesus Kapendem ring Kuburan Gua sane Sukla

50-51 Duk punika wenten anak sane mapesengan dane Yusup saking Kota Arimatea ring Wawidangan Yudea. Dane anak dharma lan satya. Dane sedek nyantosang dinane Sang Hyang Pengardi jagi mamrentah dados Raja ring jagate. Yadiastun dane soroh Yahudine, dane nenten setuju ring putusan lan parilaksanan pengadilan agamane. 52 Sasampune Hyang Yesus seda, dane Yusup punika tangkil ring gubernur Pilatus tur nunas layon Hyang Yesuse. 53 Raris dane nedunang layon Hyang Yesuse saking kayu salibe, tur kabungkus nganggen kain kasa sane alus. Layon Hyang Yesuse kagenahang ring tengah bukit batune sane kapongpong dados gua. Lan kuburane punika kari sukla. 54 Dinane punika dina Sukra makire rahina Sabat. Punika mawinan layon Idane gelis-gelis kapendem.

55 Anak istri-istri sane nyarengin Hyang Yesus saking Galilea, nututin Dane Yusup ka kuburan guane punika. Ipun sami nyingakin layon Hyang Yesuse kagenahang irika. 56 Raris ipun sami budal tur nyadyayang raracikan lan minyak miyik, sekadi sane biasane kaanggen ngaminyakin layon. Nanging ring rahina Sabat, ipun nenten nglaksanayang pakaryan napi-napi krana ninutin ukum agama Yahudine.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”